U ndalua edhe mbrëmë në kufi, këshilltarja e Kurtit tregon sot çfarë i ndodhi

Këshilltarja e kryeministrit Kurti për Luginën e Preshevës, Ardita Sinani, është ndaluar prapë mbrëmë nga policia kufitare serbe në pikëkalimin kufitar në Muçibabë.

Kjo është hera e dytë që Sinani është ndaluar gjatë ditës së djeshme.

“Mbrëmë rreth orës 21:00 në vendkalimin e njëjtë kufitar me Republikën e Kosovës, Muçibabë, përsëri u ndalova nga policia kufitare serbe. Për herë të dytë brenda të njëjtës ditë. Jo vetëm duke e lëshuar Serbinë, por edhe duke hyrë. Këtë herë periudha kohore ishte më e shkurtër se në orët e mëngjesit të djeshëm. Edhe kësaj radhe pa asnjë sqarim e arsyetim! Thjeshtë ndalesë! Kjo është Serbia me të cilën si shqiptarë të Luginës së Preshevës ballafaqohemi çdo ditë. Kjo është Serbia për pakicat kombëtare”, ka shkruar Sinani.

Ajo dje bëri të ditur se është ndaluar nga policia kufitare serbe në të njëjtën pikë kufitare për rreth një orë.

“Arsyetimi i vetëm që mu dha nga policët kufitarë të Serbisë “Kemi urdhër për ndalimin tuaj dhe nuk mund të të lejojmë ta kalosh kufirin pa marrë pëlqim nga baza””, kishte shkruar dje Sinani.

“Kjo mbase mund të jetë kostoja e të qenurit Këshilltare Politike e Kryeministrit të Republikës së Kosovës, por sigurisht nuk do të jetë mjeti me të cilin do të heshtet zëri për të drejtat e shqiptarëve të Luginës së Preshevës.”