Sot s’pati korridore humanitare në Ukrainë, luftimet po vazhdojnë

Ukraina nuk mundi të hapë asnjë korridor humanitar sot pasi luftimet nuk janë ndalur, ka thënë zëvendëskryeministrja Iryna Vereshchuk.

Korridoret e mëparshme të evakuimit, që kanë pasur nivele të ndryshme të suksesit, kanë lejuar njerëzit që të largohen nga zonat e rrezikshme dhe kanë mundësuar qarkullimin e ndihmave humanitare.

Vereshchuk iu ka bërë thirrje Kombeve të Bashkuara që të ndërhyjnë për të mbikëqyrur një rrugë të evakuimit për civilët e mbetur në fabrikën e çelikut në Mariupol – bastioni i fundit i forcave ukrainase në qytetin port të rrethuar.

Zëvendëskryeministrja ukrainase i kërkoi Sekretarit të Përgjithshëm të OKB-së, Antonio Guterres, që të ishte “iniciatori dhe garantuesi” i një rruge humanitare nga fabrika e çelikut “Azovstal” dhe bëri thirrje që OKB-ja dhe Komiteti Ndërkombëtar i Kryqit të Kuq të shoqërojnë çdo të evakuuar.