SBAShK-u propozon që të mos ketë kthim në grevë

28/12/2022

Sindikata e Bashkuar e Arsimit, Shkencës dhe Kulturës (SBAShK) i ka propozuar Bashkimit të Sindikatave të Pavarura të Kosovës (BSPK) që të mbyllet greva, që ishte pezulluar më 1 tetor.

Pas takimin me kryetarë të nivelit komunal sindikal dhe universiteteve, SBASHK-u ka thënë se i është përmbushur kërkesa kryesore, pra ajo e miratimit të Ligjit për Paga.

“Duke u nisur nga fakti se Ligji i pagave është votuar nga Parlamenti dhe pritet të nis implementimi i tij në shkurtin e vitit 2023 e që ishte kërkesë kryesore e SBASHK-ut, Kryesia dhe Këshilli Grevist kanë dalë para kryetarëve të nivelit komunal sindikal e të Universiteteve me propozimin që SBASHK-u t’i drejtohet BSPK-së që të merret vendim për mbylljen e grevës së pezulluar më 1 tetor 2022. Këtë propozim pjesëmarrësit e këtij takimi e kanë aprovuar unanimisht pas diskutimeve që janë zhvilluar lidhur me këtë çështje”, ka thënë SBAShK-u në një njoftim për media.

Ndryshe, punëtorët e sektorit publik dhe mësimdhënësit ishin në grevë nga fundi i gushtit deri më 1 tetor. Ata kërkonin nga 100 euro shtesë në muaj deri në hyrjen në fuqi të Ligjit për Paga.

Ndërkaq, në fund të dhjetorit është miratuar ky Ligj për Paga, i cili pritet të hyjë në fuqi në shkurt të vitit 2023.

Written by: ClubFm Kosova

Rate it