Premiera e shfaqjes “Të Gjashtët kundër Turqisë” këtë të hënë në TKK

Qendra Multimedia sjell të hënën, më 9 mars, shfaqjen “Të Gjashtët kundër Turqisë”, me fillim nga ora 20:00, në Teatrin Kombëtar të Kosovës.

E krijuar nga një kolektiv ndërkombëtar teatror me artistë nga Kosova, Turqia dhe vende të tjera të BE-së, shfaqja performohet në shqip, anglisht dhe turqisht. E frymëzuar nga mitologjia greke dhe tragedia “Të shtatët kundër Tebës”, vepra ofron një reflektim mbi Turqinë e Erdoganit dhe ngrit pyetje të rëndësishme mbi dështimin e shoqërive pluraliste dhe rritjen e ideologjive autoritare.

Shfaqja trajton ndikimin e regjimeve që ushtruan terror, dhunë dhe përndjekje, duke ndikuar jo vetëm tek individët, por edhe përtej kufijve të tyre. Ajo paraqet një pasqyrë kritike mbi mënyrën se si pushteti mund të përdoret për shtypje dhe frikësim, duke u bërë një mesazh i fuqishëm për publikun global.

Dramaturgu britanik Mark Ravenhill e ka përshkruar veprën si: “Një pasqyrë epike e përpjekjeve politike, e spikatur me satirë dhe një nuancë absurdi. Six Against Turkey është një vepër e re e rëndësishme nga një dramaturg i njohur bashkëkohor.”

Shfaqja ka qenë pjesë e repertorit teatrore vendore dhe ndërkombëtare që nga 16 tetori 2024, kur u mbajt premiera, duke fituar vëmendje për mesazhet e saj të guximshme dhe angazhimin artistik ndërkombëtar./KultPlus.com