Përdori libra jashtëligjshëm për trajnim të AI, Apple paditet nga autorët

Gjigandi i teknologjisë, Apple, është akuzuar nga autorët në një padi të premten për përdorim të paligjshëm të librave të tyre të mbrojtur me të drejta autoriale për të ndihmuar në trajnimin e sistemeve të saj të inteligjencës artificiale, raportoi të dielën Reuters.

Ky zhvillim është pjesë e një beteje ligjore në zgjerim mbi mbrojtjen e pronës intelektuale në epokën e inteligjencës artificiale.

Padia kolektive e propozuar, e paraqitur në gjykatën federale në Kaliforni, tha se Apple ka kopjuar vepra të mbrojtura pa pëlqimin dhe pa kreditim ose kompensim.

“Apple nuk është përpjekur t’i paguajë këta autorë për kontributet e tyre në këtë sipërmarrje potencialisht fitimprurëse”, thuhet në padinë e ngritur nga autorët Grady Hendrix dhe Jennifer Roberson.

Padia është e fundit në një valë çështjesh nga autorë, media dhe të tjerë që akuzojnë kompanitë e mëdha të teknologjisë për shkelje të mbrojtjes ligjore për veprat e tyre.