PDK nesër dorëzon kallëzim penal ndaj Zyrës së Rregullatorit të Energjisë

Partia Demokratike e Kosovës të premten do të dorëzojë kallëzim penal kundër Bordit të Zyrës së Rregullatorit të Energjisë, për mosrespektim të vendimit të Gjykatës Themelore, e cila e cilësoi si të kundërligjshëm vendimin për ngritjen e çmimit të faturave të energjisë.

Shefi i Grupit Parlamentar të PDK-së, Abelard Tahiri, në një konferencë për media, pas mbledhjes së Kryesisë së Kuvendit, tha se ZRRE po I dëmton qytetarët e Kosovës.

“Shpresojmë që do të ketë konsensus në këshill të kemi vend. Sa i përket mos respektimit të zyrës së rregullatorit për pezullimin e energjisë, ZRRE është deklaruar se nuk do ta respektojë dhe nesër do të procedojmë në prokurori për secilin anëtar të ZRRE-së. Ky është haraç që bartësit e Albinit duan t’ia japin qytetarëve të Kosovës. Këta njerëz po dëmtojnë mbi 350 mijë familje në Kosovë”, deklaroi Tahiri.