Osmani pas takimit me von der Leyen: Sa i përket liberalizimit të vizave, Kosova po trajtohet me standard tjetër

Presidentja e Kosovës, Vjosa Osmani, ka mbajtur konferencë të përbashkët me presidenten e KE-së, Ursula von der Leyen.

“Është vendimtare që BE të na qëndrojë pranë dhe të na mbështesë në përballje me krizat me të cilat që po ballafaqohemi. Në radhë të parë më krizën energjetike, që ka kapluar edhe rajonin tonë. E mirëpresim jashtëzakonisht shumë faktin që mbështetja e rajonit në këtë drejtim është në qendër të vizitës tuaj dhe shpresojmë që do ti identifikojmë mekanizmat e duhur për lehtësimin e përballjen me rritjen e çmimeve të energjisë, për investime të vogla dhe të mëdha në burime të ripërtritshme të energjisë, për investimin në përmirësimin e infrastrukturës energjetike dhe kapacitetet të rrjetit, si dhe në masat eficiente të energjisë”, tha ajo.

“Kosova pavarësisht  se është përformuesi më i mirë në thuajse çdo indeks demokratik dhe të sundimit të ligjit në rajonin tonë dhe më gjerë, për fat të keq sa i përket liberalizimit të vizave vazhdohet të trajtohet me një standard tjetër”, tha Osmani.

Ajo ka falënderuar von der Leyen dhe KE-në “për mbështetjen e vazhdueshme, qëndrimin konsistent që nga viti 2018, por edhe për edhe rikonfirmimin e fundit të KE-së se Kosova i ka plotësuar të gjitha kriteret e liberalizimit të vizave”.

“Shpresojmë shumë që thirrja e KE-së të respektohet nga të gjitha shtetet anëtare dhe kjo padrejtësi e madhe ndaj qytetarëve të Kosovës të përfundojë pa kritere të reja teknike, të cilat do të bllokonin vendimmarrjen politike”, deklaroi presidentja Osmani.

“Kosova është 100 për qind e përafëruar me cdo vendim të politikës së jashtme dhe mbrojtjes që e merr sa i përket afrimit të saj me BE-në, përfshirë sanksionet ndaj Rusisë”, tha ajo.