Osmani: Lufta për drejtësi, mision i jetës

Në Forumin për Gratë, Paqen dhe Sigurinë, presidentja Vjosa Osmani ka thënë se duhet angazhuar për të mos hequr dorë në luftën për drejtësi, duke shtuar se ky angazhim është mision i jetës.

Osmani ka deklaruar të hënën se lufta për drejtësi për gratë s’është punë e vetëm një misioni apo forumi.

“Të angazhohemi për atë, s’është vetëm punë e një forumi e as e një misioni a një mandati, por bëhet mision i jetës. Jemi bërë bashkë për dhunën që flitet për konfliktet, gratë e vajzat preken më së shumti. Ndërsa jemi bërë bashkë për t’i diskutuar këto çështje, ndjej inspirim të thellë nga gratë e Kosovës”, ka deklaruar Osmani.

Sipas saj, gratë në Kosovë kanë mbijetuar në kohët më të dhimbshme.

“Rrugëtimi i tyre nuk ka qenë i lehtë”, ka shtuar ajo.

“Kosova qëndron si kampione e kësaj agjende, përfshirja qëndron si gur themeltar, si përpjekje nga dita e parë…Dua të shpreh mirënjohje për partnerët tanë, institucione tona, që ta bëjnë këtë forum të suksesshëm…Në një kohë kur konfliktet vazhdojnë, agjenda për gruan, paqen dhe sigurinë është më e rëndësishme se kurrë”, ka thënë Osmani.

Gjatë Forumit është bërë nënshkrimi për hapjen e qendrës rajonale të ekselencës Gratë, Paqja dhe Siguria në Kosovë.