Një ëmbëltore në Kiev krijon ëmbëlsirë për nder të kryeministrit Boris Johnson 

Një ëmbëltore në Kiev ka krijuar një lloj të re torteje, në nder të kryeministrit britanik, Boris Johnson, për mbështetjen e tij për Ukrainën.

‘Zavertailo’s Cafe’ filloi të përgatiste ëmbëlsirën muajin e kaluar, për të cilën thotë se ishte frymëzuar nga byreku anglez me mollë dhe modeli i flokëve të Johnson.

Punonjësi në ëmbëltore, Bohdan Bilyak, tha se ky lloj i tortës ishte i frymëzuar nga Johnson.

“Ne u frymëzuam nga kryeministri i Mbretërisë së Bashkuar, Boris Johnson. Pse? Sepse tani ai e ndihmon shumë vendin tonë, ai tregon mbështetje të madhe dhe vendosëm të bëjmë një ëmbëlsirë për nder të tij”, tha ai.

Bilyak tha se ëmbëlsirat, të cilat përbëhen nga kremi me vanilje, mollë të pjekura, beze italiane dhe një top akullore vanilje, pothuajse gjithmonë shiten.

Mbretëria e Bashkuar ka ofruar ndihmë humanitare, financiare dhe ushtarake për Ukrainën që nga fillimi i agresionit rus, raporton AP, transmeton Klankosova.tv.

Në fillim të kësaj jave, Britania e Madhe njoftoi se do të dërgonte raketat e saj të para me rreze të gjatë veprimi në Ukrainë.