Nasuf Bejta e zëvendëson Vasfije Krasniqin në Kuvend

Nasuf Bejta do ta zë vendin e Vasfije Krasniqit në Kuvendin e Kosovës, pasi kjo e fundit dha dorëheqje nga ky post.

Ky vendim u mor nga Komisioni Qendror i Zgjedhjeve (KQZ), në mbledhjen e së martës.

Bejta i takon Listës “Guxo” dhe në zgjedhjet e 14 shkurtit 2021, i kishte mbledhur 5,763 vota.

Ai kishte shpallur kandidaturën për president, duke sfiduar Vjosa Osmanin.

Ndryshe, deputetja e LVV-së, Vasfije Krasniqi, është tërhequr nga pozita e deputetes më 21 shtator.

Ajo ka treguar se këtë vendim e ka marrë për arsye shëndetësore.

“Duke qenë se jam në një trajtim mjekësor, dhe si rezultat në këtë fazë të trajtimit më duhet që për çdo muaj të kem vizita të rregullta, dhe përderisa i njëjti mund të zgjas, mua më vështirësohet, përkatësisht pamundësohet tani dhe ndoshta edhe në të ardhmen realizimi i obligimeve të mija si deputete”, ka njoftuar Krasniqi përmes llogarisë së saj në Facebook.

“Kështu edhe përkundër dëshirës sime që unë të vazhdoj me përfaqësimin e juaj në Kuvend, më duhet të ju njoftoj se unë kam vendosur të japë dorëheqje nga pozita e deputetes. Rrjedhimisht për këtë dorëheqje sapo kam njoftuar edhe Kryetarin e Kuvendit z. Glauk Konjufca, si dhe kryesinë e Kuvendit”.