Lily Collins do të luajë Audrey Hepburn në filmin për “Breakfast at Tiffany’s”

Ylli i serialit të Netflix, Emily in Paris, Lily Collins, do të interpretojë ikonën e kinemasë Audrey Hepburn në një film të ri që do të tregojë historinë e realizimit të komedisë romantike të vitit 1961, Breakfast at Tiffany’s.

Projekti, ende pa titull zyrtar, bazohet në librin jofiksional të Sam Wasson, “Fifth Avenue, 5 AM: Audrey Hepburn, Breakfast at Tiffany’s and the Dawn of the Modern Woman”. Skenari është shkruar nga Alena Smith, krijuese e serialit Dickinson. Emri i regjisorit ende nuk është bërë i ditur.

Collins, vajza e muzikantit Phil Collins, ndau entuziazmin e saj në rrjetet sociale, duke u shprehur se pas gati një dekade zhvillimi dhe një jete admirimi për Hepburn, ndihet e nderuar që më në fund mund ta sjellë këtë projekt në ekran.

Historia pas filmit legjendar

Filmi i vitit 1961 ishte një adaptim i lirë i novelës së vitit 1958 nga Truman Capote. Personazhi i Holly Golightly, një grua glamuroze që jeton në New York dhe shoqërohet me burra të pasur, u kthye në një nga figurat më ikonike të kinemasë.

Capote kishte dëshiruar që rolin ta luante Marilyn Monroe dhe i bëri presion studios Paramount Pictures për ta përzgjedhur atë. Megjithatë, Monroe ishte nën kontratë me 20th Century Fox dhe, sipas raportimeve, u këshillua ta refuzonte rolin. Edhe Shirley MacLaine dhe Kim Novak e refuzuan përpara se Hepburn të përzgjidhej vendim që Capote e kritikoi publikisht.

Para premierës, departamenti i marketingut i Paramount u përpoq ta paraqiste Golightlyn larg idesë së një punëtoreje seksi, duke theksuar elegancën dhe imazhin e pastër të Hepburn.

Filmi rezultoi një sukses i madh kritik dhe financiar, duke fituar rreth 14 milionë dollarë në arkat globale. Ai fitoi dy çmime “Oscar” për kolonën zanore nga Henry Mancini dhe për këngën “Moon River”.

Një rrëfim i ri për prapaskenat

Filmi i ri me Collins pritet të jetë rrëfimi i parë i plotë për realizimin e këtij projekti legjendar, duke përfshirë sfidat e produksionit dhe incidentet në xhirime si rasti kur një anëtar i ekipit thuajse u godit nga rryma gjatë skenës ikonike hapëse përpara dyqanit kryesor të Tiffany & Co. në Fifth Avenue.

Ende nuk janë bërë publikë aktorët që do të interpretojnë Capoten apo regjisorin e filmit origjinal, Blake Edwards.

Më herët, Hepburn është portretizuar nga Jennifer Love Hewitt në filmin televiziv “The Audrey Hepburn Story” (2000). Ndërsa një tjetër projekt biografik me Rooney Mara, i drejtuar nga Luca Guadagnino, u anulua në vitin 2023.

Projekti i ri me Lily Collins pritet të rikthejë vëmendjen te një nga filmat më të dashur të shekullit XX dhe te figura e paharrueshme e Audrey Hepburn./KultPlus.com