Kurti: Barrikadat që vendosen në Veri nuk vijnë nga poshtë, por vendosen nga lart

Kryeministri i Kosovës, Albin Kurti, ka ripërsëritur se më 1 shtator do të nisë zbatimi i reciprocitetit ndaj Serbisë për targat dhe dokumentet e identifikimit.

Ai ka thënë se konvertimi i targave të automjeteve nga ato ilegale në RKS i shërben rendit dhe ligjit, sigurisë publike dhe lëvizjes së lirë në gjithë Republikën.

Po ashtu, kreu i qeverisë ka theksuar se vendimi për pajisje për dokumente për hyrje-dalje në pikat kufitare për ata që prezantojnë dokumentet e lëshuara nga Serbia nuk do ta pengojë lirinë e lëvizjes.

“Kam dëgjuar për lajmin e rremë se ID ose dokumentet serbe do të konfiskohen në kufi në këmbim të dokumenteve për hyrje-dalje. Kjo nuk është e vërtetë”, ka thënë Kurti.

Sipas tij, dokumenti për hyrje-dalje është dokument shtesë që jepet pa pagesë.

Ai ka bërë thirrje që të përcillen njoftimet nga qeveria dhe të verifikohen burimet e lajmeve në mënyrë që të anashkalohet dezinformimi.

“Sot dezinformimi paraqet rrrezik për sigurinë kombëtare. Ju bëj thirrje që të përcillni njoftimet nga qeveria jonë, që të verifikoni burimet e lajmeve”.