Johnny Depp shfaqet i transformuar si Ebenezer Scrooge në adaptimin e ri të “A Christmas Carol”

Aktori Johnny Depp po rikthehet në një prodhim të madh hollywoodian, duke interpretuar personazhin e Ebenezer Scrooge në një version të ri të romanit klasik të Charles Dickens, “A Christmas Carol”. Ky është filmi i tij i parë me buxhet të madh pas katër vitesh, pas një periudhe larg produksioneve kryesore të studiove amerikane.

Pamjet nga seti i xhirimit tregojnë Depp të transformuar plotësisht në rolin e anti-heroit të Dickens-it, një figurë e vetmuar që përballet me gabimet e së kaluarës para se të ndryshojë rrënjësisht. Ai shfaqet me pallto blu brokade, kapele të zezë dhe favoritet gri, ndërsa ndodhet në shoqërinë e aktores Andrea Riseborough, e cila interpreton shpirtin e Krishtlindjes së shkuar. Riseborough shfaqet me kostum të bardhë dhe elementë vizualë që theksojnë natyrën fantazmagorike të personazhit të saj.

Produksioni përfshin një kast të njohur aktorësh, duke përfshirë Sir Ian McKellen, Daisy Ridley, Rupert Grint, Sam Claflin, Ellie Bamber dhe Tramell Tillman. Romani i Dickens-it, i botuar në vitin 1843, rrëfen historinë e Scrooge-it, një koprrac i moshuar që vizitohet nga tre shpirtra në prag të Krishtlindjes, duke sjellë mesazhe për reflektim dhe ndryshim personal.

Ky projekt pritet të ketë konkurrencë të fortë, pasi Warner Bros po zhvillon një tjetër adaptim të “A Christmas Carol”, me regji nga Robert Eggers dhe Willem Dafoe në rolin kryesor.

Depp ka theksuar më herët se raportimet për jetën e tij gjatë viteve të fundit kanë qenë të pasakta, duke theksuar se nuk ka ndaluar së punuari, pavarësisht mungesës në produksione kryesore hollywoodiane. Rikthimi në këtë projekt shënon një kapitull të ri për aktorin, duke e vendosur sërish në qendër të skenës kinematografike globale./KultPlus.com