Italia blen për 30 milionë euro një portret të rrallë të Caravaggio-s

Shteti italian ka blerë një pikturë të rrallë të mjeshtrit të barokut Caravaggio për rreth 30 milionë euro, një nga shumat më të larta të paguara ndonjëherë për një vepër arti në vend.

Vepra paraqet Imzot Maffeo Barberini, i cili më vonë u bë Papa Urban VIII. Autoritetet italiane e konsiderojnë pikturën veçanërisht të rëndësishme për historinë e artit, pasi portretet janë shumë të rralla në krijimtarinë e artistit.

Sipas ministrit italian të Kulturës, Alessandro Giuli, blerja është pjesë e një strategjie më të gjerë për të siguruar që kryeveprat e rëndësishme të mbeten të arritshme për publikun dhe të mos përfundojnë në koleksione private.

Piktura ishte mbajtur për vite me radhë në një koleksion privat në Florence dhe iu prezantua publikut për herë të parë në Rome në vitin 2024. Nga rreth 65 veprat e njohura që kanë mbijetuar të Caravaggio-s në mbarë botën, vetëm tre janë portrete, çka e bën këtë pikturë edhe më të veçantë.

Tani vepra është transferuar në koleksionin e përhershëm të Palazzo Barberinit, pallati historik i familjes së personit të paraqitur në pikturë. Ajo është prezantuar për herë të parë për publikun atje dhe do të ekspozohet së bashku me vepra të tjera të artistit.

Piktura është realizuar rreth vitit 1598 dhe e paraqet Barberinin si një klerik me mjekër, duke shtrirë dorën e djathtë sikur të japë udhëzime, ndërsa në dorën e majtë mban një dokument. Barberini u zgjodh Papë në vitin 1623 dhe qëndroi në krye të Selisë së Shenjtë deri në vdekjen e tij në 1644, duke u njohur gjatë jetës edhe si një mbrojtës i madh i arteve.

Caravaggio, emri i vërtetë i të cilit ishte Michelangelo Merisi, vdiq në vitin 1610 në moshën vetëm 38-vjeçare. Ai konsiderohet një nga piktorët më të rëndësishëm të epokës së tij dhe u bë i famshëm për përdorimin e teknikës së Chiaroscuro, kontrasti dramatik i dritës dhe hijes që u jep veprave të tij realizëm të fortë dhe thellësi psikologjike./KultPlus.com