Fituesi i Eurovisionit e kthen trofeun në shenjë proteste kundër pjesëmarrjes së Izraelit

Nemo, këngëtari zviceran dhe fituesi i Eurovision 2024, ka njoftuar të enjten se po kthen trofeun e fituar, si protestë ndaj pjesëmarrjes së Izraelit në edicionin e vitit të ardhshëm.

26-vjeçari, tha se ekziston “një konflikt i qartë” midis ideve të Eurovisionit për “unitet, përfshirje dhe dinjitet për të gjithë” dhe vendimit për të lejuar Izraelin të garojë.

Në një postim në Instagram, Nemo shkroi: “Edhe pse jam jashtëzakonisht mirënjohës për komunitetin rreth këtij konkursi dhe gjithçka që kjo përvojë më ka mësuar si person dhe artist, sot nuk ndjej më se ky trofe i përket raftit tim.”

Vendimi i tij vjen në një moment të ndërlikuar për Eurovision 2026, i cili po përballet me bojkot nga pesë vende për shkak të luftës së Izraelit në Gaza. Pas vendimit të European Broadcasting Union (EBU) për të mos përjashtuar Izraelin, Spanja, Irlanda, Holanda dhe Sllovenia njoftuan se do të bojkotojnë konkursin, ndërsa të mërkurën iu bashkua edhe Islanda, ku bordi i transmetuesit kombëtar RÚV vendosi të mos marrë pjesë.

Nemo theksoi: “Nuk bëhet fjalë për individë apo artistë. Konkursi është përdorur përsëritësisht për të zbutur imazhin e një shteti të akuzuar për shkelje të rënda, ndërsa EBU insistonte se Eurovision është ‘jo-politik’. Kur vende të tëra tërhiqen për shkak të kësaj kontradikte, duhet të kuptohet se diçka nuk shkon. Për këtë arsye kam vendosur të dërgoj trofeun tim në selinë e EBU-së në Gjenevë.”