Edicioni i 17-të i Sanremo Junior, 12-vjeçarja Ambra Marku do të përfaqësojë Shqipërinë

Pas suksesit të arritur në vitin 2024 nga Kjara Ibraj, një tjetër lezhjane do të përfaqësojë Shqipërinë në Sanremo Junior, që do të zhvillohet në mesin e muajit prill në Itali.

Ajo është 12-vjeçarja Ambra Marku, nxënëse e shkollës “Besëlidhja”, e cila do të konkurrojë me këngën “Valsi i Dashurisë” të ikonës shqiptare Vaçe Zela.

Për Markun, pjesëmarrja në këtë aktivitet ndërkombëtar ka qenë një ëndërr e saj, të cilën nuk e kishte menduar se do ta arrinte.

“Në Sanremo Junior ishte një ëndërr që u bë realitet. Nuk e prisja fare që të kaloja tek ky konkurs. Më erdhi si surprizë, por kur e mora vesh, u emocionova shumë.”

Përfaqësimi i Shqipërisë përmes këngëtareve nga Lezha për të dytën herë në këtë konkurs tregon se ky qytet ka talente në fushën e muzikës, thotë mësuesja Albana Përvathi.

“Në fakt është fat i madh për qytetin tonë, por edhe për Shqipërinë, që edhe këtë vit ne përfaqësohemi si qytet, si Lezhë, por edhe si vend, me emrin Ambra Marku. Specifika e këtij viti është që Ambra shkon me një këngë shqiptare, shkon me ‘Valsi i Dashurisë’, këngë e të madhes Vaçe Zela.”

Ambra Marku e ka nisur rrugëtimin muzikor që në moshën 6-vjeçare dhe që prej asaj kohe ka marrë mbi 40 çmime të ndryshme në aktivitetet e organizuara brenda vendit. Ajo synon të përfaqësojë denjësisht Shqipërinë edhe në Sanremo Junior, i cili këtë vit shënon 17-vjetorin e tij dhe do të mbahet më 14 prill në Ariston Theatre. /rtsh.al/ KultPlus.com