Çmimet e naftës bien pas progresit në bisedimet ShBA-Iran

Çmimet e naftës po bien sot, pasi presidenti amerikan Donald Trump deklaroi se është bërë “progres i madh” në bisedimet diplomatike me Iran.

Nafta Brent, që shërben si standard global, ra me 2.8% në 106.7 dollarë për fuçi. Ndërsa WTI (standardi amerikan) zbriti me 3.3% në 98.8 dollarë për fuçi. Kjo rënie vjen pasi Brent kishte arritur në 114.4 dollarë për fuçi të hënën, niveli më i lartë i mbylljes këtë vit.

Sipas analistëve të Deutsche Bank, sinjalet e qarta se armëpushimi mes SHBA-së dhe Iranit po mbahet ende në fuqi – pavarësisht disa përplasjeve të fundit – kanë ndihmuar në uljen e çmimeve dhe në zbutjen e frikës për një përshkallëzim të ri të konfliktit.

Fokusi i rikthyer tek diplomacia vjen pasi plani i Trump, i quajtur “Project Freedom”, për të shoqëruar anijet nëpër Ngushticën e Hormuzit u përball me reagime të ashpra nga Irani, përfshirë sulme ndaj një porti të madh nafte në Emiratet e Bashkaura Arabe. Më pas, Trump vendosi ta ndalë përkohësisht këtë masë.

Ndërkohë, edhe Beijing ka përsëritur thirrjet për përfundimin sa më të shpejtë të luftës, gjatë një takimi mes ministrit të jashtëm kinez dhe homologut të tij iranian, Abbas Araghchi. Kina mbetet blerësi më i madh i naftës iraniane, dhe Trump pritet të udhëtojë atje javën e ardhshme për t’u takuar me liderin kinez Xi Jinping.

Edhe tregjet financiare kanë reaguar pozitivisht ndaj këtyre zhvillimeve diplomatike. Indekset kryesore në Azi u mbyllën në rritje, ndërsa në Evropë, tregjet në Paris, Frankfurt dhe Londër janë rritur rreth 1.5% gjatë tregtimit të mëngjesit.