BKK dhe ASHAK nënshkruajnë marrëveshje bashkëpunimi për avancimin e shërbimeve bibliotekare

Biblioteka Kombëtare e Kosovës (BKK) dhe Akademia e Shkencave dhe Arteve e Kosovës (ASHAK) kanë nënshkruar një marrëveshje bashkëpunimi, me synim forcimin e lidhjeve institucionale dhe përmirësimin e shërbimeve bibliotekare.

Marrëveshja parasheh bashkëpunim në kuadër të rrjetit bibliotekar dhe shfrytëzimin e platformës KOHA për katalogimin, inventarizimin dhe përpunimin bibliografik të fondit të ASHAK-ut, si dhe azhurnimin e bibliografive të akademikëve.

Po ashtu, dokumenti përfshin trajnimin e stafit profesional, shkëmbimin e materialeve bibliotekare dhe përvojave profesionale, si dhe realizimin e projekteve të përbashkëta kulturore, edukative dhe shkencore.

Sipas institucioneve, ky bashkëpunim përfaqëson një hap të rëndësishëm drejt përmirësimit të qasjes në burime shkencore dhe akademike, si dhe rritjes së cilësisë së shërbimeve për komunitetin hulumtues dhe publikun e gjerë./KultPlus.com