Berisha: Për shkak të vendosjes së stikerave, sivjet u siguruan rreth 30 mijë vetura më shumë

Vendosja e stikerave në xhama të automjeteve, ka ndikuar direkt në uljen e numrit të automjeteve të pa regjistruara në vendin tonë.

Valon Berisha, drejtor i financave në Byronë Kosovare të Sigurimit, tregon se sipas të dhënave zyrtare në fund të muajit gusht të këtij viti, numri i policave të shitura është rreth 30 mijë më i lartë në raport me muajin gusht të vitit 2021.

“Padyshim se vendosja stikerave në xhama të automjeteve është një projekt shumë i rëndësishëm që po i jep rezultatet në praktikë. Efekti më i madh do të jetë në fillim të tremujorit të dytë të vitit të ardhshëm, kur do të fillojë ngjitja e stikerave me ngjyrë tjetër, element ky që vetëm nga pamja e dallon automjetin e paregjistruar me atë të regjistruar”, ka deklaruar Berisha.

Berisha thotë se sektori i sigurimeve në Kosovë, është duke avancuar në raport me shtetet e rajonit.

“Falë menaxhimit të mirë të drejtorit Mazreku, sot Byroja është Institucion model. Sistemi INSUREX sot është më i avancuari në raport me të gjitha shtetet e rajonit, por edhe më larg”, deklaroi Berisha për Frontonline.