Nagavci: Jam e bindur se ka mësimdhënës që do t’i nënshtrohen testimit

Ministrja e Arsimit, Arbërie Nagavci, është shprehur e bindur që ka mësimdhënës të cilët janë të gatshëm të aplikojnë për t’u pajisur me licencë të avancuar, që nënkupton t’i nënshtrohen testit me shkrim.

Nagavci ka deklaruar se tashmë kanë miratuar udhëzimet administrative të cilat e rregullojnë procesin e licencimit dhe avancimit në karrierë të mësimdhënësve si dhe vlerësimin e performancës së tyre.

Këto deklarata ministrja i ka dhënë të mërkurën në eventin përmbyllës të Projektit QATEK, i cili ka për qëllim fillimin e një sistemi për përgatitjen e mësimdhënësve të rinj të orientuar në cilësi.

Ndryshe, dy javë më parë Nagavci ka njoftuar se në qershor të vitit 2024 pritet që mësimdhënësit t’i nënshtrohen një provimi.

Në konferencën për media të fundvitit, ajo ka thënë se ky testim do të mundësojë licencën e avancuar për mësimdhënësit, të cilët edhe do të paguhen nga Ministria e Arsimit në rast se tregohen të suksesshëm.

“Ne kemi paraparë edhe buxhetin i cili do të shfrytëzohet me qëllim të pagesës për mësimdhënësit të cilët do të avancohen pasi të përfundojnë suksesshëm licencimin e tyre, përfshirë edhe testimin”, ka thënë ministrja.

Nagavaci po ashtu ka bërë të ditur se po bashkëpunojnë me Shqipërinë për hartimin e udhëzuesit për realizim të këtij procesi.

Lidhur me këtë ka reaguar kryetari i SBASHK-ut, Rrahman Jasharaj, i cili ka thënë se testimi është nënçmim dhe ofendim për mësimdhënësit.