Diskutimi për Asociacionin, përfaqësues nga Qeveria e Presidenca arrijnë në Ambasadë

Përfaqësues të Qeverisë dhe Presidencës tashmë kanë arritur në objektin e Ambasadës Amerikane në Prishtinë në diskutimin rreth Asociacionit të Komunave me shumicës serbe, që pritet të nisë pas pak, shkruan Reporteri.net.

Në objektin e Ambasadës së SHBA-së, tashmë ka arritur shefi i kabinetit të kryeministrit Kurti, Luan Dalipi, ministrat Nenad Rashiq,  Emilija Rexhepi, Elbert Krasniqi e po ashtu edhe Ministrja e Arsimit, Arbërie Nagavci e ai i Shëndetësisë, Arben Vitia.

Këta të fundit, s’dihet nëse kanë shkuar në cilësinë e përfaqësuesve të Vetëvendosjes apo të Qeverisë.

Në takim kanë arritur edhe përfaqësues nga Presidenca, shefi i kabinetit të Vjosa Osmanit, Blerim Vela dhe Bekim Sejdiu.

Aty ka arritur edhe Lutfi Haziri si përfaqësues nga LDK.

Në takim janë duke marrë pjesë edhe ambasadorë, zyrtarë partiakë, e pjesëtarë nga shoqëria civile.