Tempulli indian zëvendëson elefantin me robot për kryerjen e ritualeve

Një tempull në shtetin jugor indian të Kerala-s ka implementuar një elefant mekanik për të kryer ritualet e tij.

Nisma e autoriteteve në tempullin “Irinjadappilly Sree Krishna” në rrethin Thrissur është pjesë e zotimit të tyre për të ndaluar përdorimin e kafshëve të gjalla për çdo festë, transmeton Telegrafi.

Modeli u dhurua nga organizata “People for Ethical Treatment of Animals” (PETA) India dhe nga aktorja Parvathy Thiruvothu.

Ata shpresojnë se kjo do të ndihmojë në mbajtjen e eventeve pa përdorur kafshët.

Të lidhur me zinxhirë, të shaluar dhe të dekoruar, elefantët luajnë një rol të rëndësishëm në festivalet e tempullit në Kerala – shteti është shtëpia e rreth një të pestës së rreth 2,500 elefantëve të robëruar të vendit.

Për vite me radhë, aktivistët e mirëqenies së kafshëve kanë vënë në dukje shqetësimet për trajtimin e tyre.

Qendra për Kërkime mbi të Drejtat e Kafshëve javën e kaluar i shkroi kryeministrit të shtetit për rritjen e vdekshmërisë së gjitarëve, duke thënë se 138 elefantë të robëruar kishin vdekur në Kerala midis vitit 2018 dhe 2023.

Në një deklaratë të lëshuar të hënën, PETA tha se nënshtrimi i elefantëve të gjallë ndaj zhurmave ekstreme të larta gjatë festivaleve ishte “mizori” dhe iu bëri thirrje të gjithë tempujve në shtet të kalojnë në elefantët mekanikë.

Sipas gazetës Indian Express, modeli i elefantit i dhuruar nga PETA është 3.3 metra i gjatë, peshon 800 kg dhe është bërë nga një kornizë hekuri.

Prifti i tempullit Rajkumar Namboothiri i tha gazetës Indian Express se autoritetet ishin të lumtura që pranuan elefantin mekanik.

“Shpresojmë se tempujt e tjerë do të mendojnë gjithashtu për zëvendësimin e elefantëve me elefantë robotikë për ritualet e tyre”, u shpreh Namboothiri. /Telegrafi/