Të dielën ndryshon ora, akrepat lëvizin 60 minuta përpara

Të dielën e fundit të marsit, qytetarët do të kalojnë nga ora dimërore në atë verore, duke zhvendosur akrepat e orës 60 minuta përpara.

Ndërrimi i orës bëhet në orën 02:00 të mëngjesit, kur ora kalon në 03:00. Me këtë ndryshim, qytetarët do të humbasin një orë gjumë, por në të njëjtën kohë do të përfitojnë më shumë dritë natyrale gjatë ditës.

Shumica e pajisjeve teknologjike, si telefonat dhe kompjuterët, e bëjnë këtë ndryshim automatikisht, ndërsa orët manuale duhet të rregullohen nga përdoruesit.

Ndryshimi i orës është një praktikë që ndodh dy herë në vit: në të dielën e fundit të marsit, kur ora shkon përpara, dhe në javën e fundit të tetorit, kur kthehet sërish prapa.

Në Evropë, ky sistem nisi të zbatohej më gjerësisht që nga viti 1974, me qëllim shfrytëzimin maksimal të dritës së diellit dhe kursimin e energjisë elektrike./KultPlus.com