Taksisti shqiptar e quan shpërblim qesharak dhuratën e Neuerit, të cilit ia gjeti dhe ia dorëzoi kuletën

Taksisti shqiptar, Hazir Stublla është bërë i famshëm së fundmi në Gjermani pasi e ka gjetur kuletën e Manuel Neuerit.

Portieri gjerman e shpërbleu taksistin shqiptar për këtë veprim.

“Kuleta e kishte emrin dhe adresën e Neuerit”, ka thënë Stublla për mediumin gjerman “Bild”, përcjell “Gazeta Express”.

Mediumi gjerman tutje shkruan se taksisti shqiptar u përpoq ta gjente portierin gjerman duke shkuar direkt në shtëpi të tij.

Aty nuk e gjeti veteranin e portës dhe më pas shkoi në qendrën stërvitore të Bayernit dhe ia dorëzoi kuletën menaxherit të tij.

Stublla besoi se do ta merrte një dhuratë që e meriton, por në fund u dëshpërua, pasi e mori një fanellë të panënshkruar nga portieri gjerman.

“Ky shpërblim është shaka. Unë kam katër fëmijë dhe nuk mund të bëj asgjë me fanellën”, ka thënë Stublla për “Bild”, i dëshpëruar pasi i kishte bërë 120 kilometra për ta dërguar kuletën në adresën e duhur të pronarit.