Super-jahti i Jeff Bezos mbërrin në Durrës, furnizohet me 170 mijë litra karburant

Jahti “Koru” i themeluesit të kompanisë “Amazon” Jeff Bezos ka mbërritur në Durrës.

Ndërsa çmimi i naftës në treg njeh rritje të vazhdueshme, jahtet turistike vijojnë ta shohin Shqipërinë si stacionin më të preferuar në rajon për furnizimin me karburant, raporton Top Channel. Superjahti ka kërkuar të ndalojë në portin më të madh shqiptar për t’u furnizuar me 170 mijë litra karburant, para se të rinisë lundrimin drejt Italisë.

Me një vlerë prej 500 milionë dollarësh dhe prodhim i vitit 2023, ai është jahti i dytë më i madh me vela në botë dhe jahti më i gjatë i ndërtuar në Holandë me një gjatësi prej 127 metrash.

Furnizimi me naftë me procedurë tranzit i sjell shtetit shqiptar në këtë rast nëpërmjet taksës së luksit të vendosur së fundmi 6,8 milion lekë. Aktualisht, jahtet e marrin me 1,1 euro litrin e naftës, plus taksat.

Sipas Drejtorisë së Përgjithshme Detare në Durrës, numri i mjeteve lundruese turistike që kanë hyrë në portet e Durrësit, Vlorës, Sarandës dhe Shëngjinit për periudhën: 1.01.2023- 31.08.2023 është 44 kroçiera dhe 1798 jahte deri më 31 gusht.