Si nisi rrahja në Kuvendin e Kosovës

13/07/2023

Deputetët e pushtetit dhe opozitës janë rrahur në seancën e sotme të Kuvendit të Kosovës.

Rrahja ka nisur gjatë kohës sa ishte duke folur kryeministri Albin Kurti.

Deputetja e Partisë Demokratike të Kosovës, Ganimete Musliu, vendosi një foto të personazhit Pinokio, derisa Kryeministri Albin Kurti po fliste në foltoren e Kuvendit.

Këtë fotografi e largoi dhe shqeu zëvendëskryeministri Besnik Bislimi.

Deputeti i PDK-së, Mërgim Lushtaku, është afruar ta lagë me ujë kryeministrin Kurti. Ministri Hekuran Murati është ngritur për të mbrojtur atë me një fasikell e Lushtaku është kthyer që ta lagë edhe Besnik Bislimin, ndërkohë që ky i fundit ka gjuajtur në drejtim të tij me shishe të ujit.

Të përfshirë në këtë përleshje fizike me pushtetin ishin vetëm deputetët e PDK-së.

Pastaj aty janë afruar disa prej ministrave, deputetët e pushtetit e të opozitës të cilët janë përfshirë në rrahje.

Më pas ka ndërhyrë edhe sigurimi i kryeministrit Albin Kurti duke tentuar t’i shpërndante të përfshirët në përleshjen fizike, derisa kryeministrin e ka larguar nga mesi i turmës.

Gjatë kësaj kohe është dëgjuar kryeparlamentari Glauk Konjufca i cili po bënte thirrje për qetësi.

Written by: ClubFm Kosova

Rate it