Shtëpia-muze e Ndre Mjedës në Kukël, xhevahir i pazbuluar

Kryeministri Edi Rama ndau sot pamje nga shtëpia-muze e ”Ndre Mjedës” në Kukël, Bushat.

Kreu i qeverisë e cilësoi këtë shtëpi-muze si një xhevahir i pazbuluar.

Shtëpia e poetit të madh u kthye në qendër muzeore pasi u realizua rikonstruksioni i plotë dhe u vendos shtatorja e tij.

Shtëpia ku jetoi dhe punoi Ndre Mjeda është ndërtuar në vitin 1906, dhe paraqet një ndërtim dykatësh të stilit neoklasik.

Gjatë viteve 1962-1979 dhe 1982-1991 ka pasur funksionin e një shtëpie-muze kushtuar poetit dhe e pajisur me objekte të ndryshme të vetë klerikut.

Kompleksi në fshatin Kukël përbëhet nga dy objekte të lidhur me njëri-tjetrin, Kisha dhe Qela, objekte këto që janë projektuar dhe realizuar nga vetë Dom Ndre Mjeda.

Kompleksi në Kukël është shpallur “Monument Kulture” në shkurt të vitit 2012./atsh/