Prezentë edhe Osmani e Kurti, çka pritet nga Forumi i Paqes në Paris

Sot fillon Forumi i Paqes në Paris, i cili do të mbledhë liderë të shumë vendeve, përfshirë edhe krerët e shtetit nga Kosova, shkruan Gazeta Online Reporteri.net.

Edicioni i pestë i këtij viti i Forumit, i titulluar “Dalja nga kriza e shumëfishtë”, i kushtohet sfidave më të mëdha të sotme, ndër të cilat janë përkeqësimi i ndryshimeve klimatike, valët e pandemisë së virusit korona, thellimi i pabarazisë dhe konfliktet gjeopolitike me pasoja globale.

Fokusi i tubimit dyditor në Paris do të jetë gjithashtu parandalimi i polarizimit shkatërrues të botës që do të kërcënonte përpjekjet kolektive në përballjen me shumë sfida të rëndësishme për njerëzimin.

Mes folësve janë përfaqësues të shumë organizatave ndërkombëtare dhe institucioneve financiare, duke përfshirë kreun e diplomacisë evropiane, Josep Borrell, Sekretarin e Përgjithshëm të Organizatës për Bashkëpunim Ekonomik dhe Zhvillim (OECD), Matthias Cormann dhe Drejtori Ekzekutiv i Botës. Programi i Ushqimit (WFP), David Beasley.

Ndër të tjera, në tubim do të flasin Guvernatori i Bankës për Zhvillim të Këshillit të Evropës (CEB), Carlo Monticelli dhe drejtorët e përgjithshëm të Organizatës Ndërkombëtare të Punës dhe UNESCO-s, Gilbert Ungbo dhe Audre Azule.

Në margjinat e këtij Forumi, përfaqësuesi i Lartë i BE-së për Politikë të Jashtme, Josep Borrell do të takohet sot me Kryeministrin e Kosovës, Albin Kurtin dhe Presidentin e Serbisë, Aleksandër Vuçiq, në takime të ndara, shkruan Gazeta Online Reporteri.net.

Kështu njoftoi dje zëdhënësi i Bashkimit Evropian për Politikë të Jashtme, Peter Stano, ndërsa theksoi se objektivi kryesor i këtyre takimeve është që të vazhdohen përpjekjet e BE-së për të ndihmuar palët që t’i ulin tensionet, si dhe të bëhen përparime në Dialog.

“Nuk do t’ua them se cili do të jetë mesazhi kryesor ngase ky mesazh kryesor do t’u përcjellet atyre në këto takime, por ama mund t’ju them se cili është objektivi kryesor i këtyre takimeve. Objektivi kryesor është që të vazhdohen përpjekjet e BE-së që të ndihmojë palët për të ulur tensionet dhe të bëhen përparime në Dialogun e Lehtësuar nga BE-ja. Pra, kjo është arsyeja kryesore”, tha Stano.

Kryeministri i Kosovës dje ka udhëtuar për në Paris. Po dje, bashkë me presidenten Osmani kanë pasur një takim me presidentin francez, Emmanuel Macron në Pallatin Elysee.

Kurti ka thënë se me Macronin kanë folur edhe për propozimin franko-gjerman, duke thënë se shërben si bazë e mirë për diskutime të mëtejshme.

“Në takimin e përbashkët me Presidenten Osmani, biseduam për thellimin e marrëdhënieve bilaterale në mes të dy shteteve, dialogun për marrëveshje Kosovë-Serbi, si dhe zhvillimet e fundit. Potencuam se Kosova ka propozuar kornizën e përgjithshme të marrëveshjes, ndërsa propozimi franko-gjerman shërben si bazë e mirë për diskutime të mëtejshme”, ka shkruar Kurti.

Për këtë takim ka njoftuar edhe Presidentja Vjosa Osmani. Ajo ka thënë se me Macronin kanë folur për procesin e dialogut dhe situatën në veri.

“Diskutuam edhe veprimet destabilizuese të Serbisë, përmes fuqizimit të strukturave ilegale të saj në Kosovë, frikësimit të qytetarëve serbë dhe nxitjes së grupeve kriminale për ta cenuar rendin dhe ligjin në veri. Kosova mbetet e angazhuar, në koordinim me partnerët ndërkombëtar, për paqe, stabilitet dhe për të garantuar një mjedis të sigurt për të gjithë qytetarët e vendit. Ndërkaq, Presidenti Macron potencoi përkrahjen e tij për paqe, siguri dhe stabilitet në Kosovë dhe rajon”, ka shkruar Osmani. /Reporteri.net

Forumi i Paqes në Paris u nis nga Macron në vitin 2018, në njëqindvjetorin e përfundimit të Luftës së Parë Botërore, me qëllim promovimin e multilateralizmit. /Reporteri.net