Përkeqësohet situata e legjendës, Pele shtrihet në spital shkaku i problemeve me zemër

Shëndeti i yllit legjendar brazilian, Pele thuhet se është përkeqësuar pasi ai u shtrua në një spital në qytetin Sao Paulo në Brazil, me ënjtje në të gjithë trupin.

Sipas ESPN Brasil, Pele, i cili aktualisht po kalon trajtim për kancerin metastatik, shkoi në spitalin Albert Einstein të martën në atë që ishte një vizitë e paplanifikuar pasi u mor nga gruaja e tij Marcia Aokoi dhe një kujdestare.

Stafi mjekësor në Einstein konfirmoi gjendjen e tij me ënjtje të përgjithshme, një sindromë edemigemike apo e përgjithshme dhe madje identifikoi ‘dështim të dekompensuar të zemrës’.

Gjithashtu raportohet se trajtimi i tij me kimioterapi për kancerin nuk po funksionon më, ndërsa ai u diagnostikua me konfuzion mendor me hyrjen në spital, ku ishte i shqetësuar.

Ai do t’i nënshtrohet disa testeve sot për një vlerësim të mëtejshëm të problemeve të zbuluara dhe problemeve me organet e tij, të cilat janë prekur nga kanceri metastatik.

Kjo thuhet se është një kohë jashtëzakonisht shqetësuese për stafin mjekësor dhe familjen e Peles, me një shqetësim të veçantë se si trajtimi i tij i kancerit nuk po funksionon.

Nuk ka asnjë afat kohor për largimin e Peles nga spitali, me legjendën braziliane ende në spitalin Einstein me gruan dhe kujdestarin e tij.

Megjithatë, vajza e Pele, Kely Nascimento këmbënguli se nuk kishte nevojë për alarm dhe se nuk kishte ‘asnjë surprizë apo urgjencë’ të përfshirë me qëndrimin e babait të saj në spital.

“Shumë alarm në media sot në lidhje me shëndetin e babait tim. Ai është në spital duke rregulluar mjekimin. Nuk ka asnjë parashikim urgjent apo të ri të tmerrshëm. Do të jem atje për Vitin e Ri dhe do të premtoj të postoj disa foto”, ka shkruar ajo në Instagram.

Zyrtarët në spital nuk kanë komentuar për shëndetin e tij, dhe ndërsa gruaja e tij Marcia konfirmoi se ikona e Brazilit ishte në spital, la të kuptohej se ishte vetëm për kimioterapinë dhe kontrollet e tij standarde.

Agjenti i Peles, Joe Fraga tha se ai nuk kishte një përditësim mbi statusin e ish-sulmuesit brazilian. /Telegrafi/