Pamje nga vërshimet në Pejë – uji vërshon rrugët, shkollat e lokalet

Reshjet e dendura të shiut gjatë dy ditëve të fundit kanë shkaktuar probleme dhe vështirësi në qytetin e Pejës.

Faqja “Peja në Fokus” në Facebook ka publikuar pamje nga vërshimet, ku shihet se uji ka përfshirë disa rrugë, lokale e shkolla.

Në pamjet e publikuara po ashtu shihet se në shkollën ekonomike “Ali Hadri” në Pejë një pjesë e korridoreve është vërshuar nga uji.

Lidhur me situatën drejtori për Mbrojtje dhe Shpëtim në Komunën e Pejës, Gëzim Gashi, ka thënë për Telegrafin se situata momentalisht është e menaxhueshme.

“Situata është e menaxhueshme për momentin. Shpresojmë që reshjet e shiut të ndalen”, ka thënë Gashi.

Vërshimet janë paralajmëruar edhe nga Instituti Hidrometeorologjik Kosovës.

Në njoftimin e institutit u bë e ditur se disa zona të Dukagjinit mund të preken më së shumti nga vërshimet. /Telegrafi/