Osmani flet për vizat në Slloveni: Disa zëra të vetmuar në BE po kërkojnë që procesi të kthehet në zero, por nuk do të pranojmë

Presidentja e Kosovës, Vjosa Osmani, në një ligjëratë të organizuar nga Qendra për Perspektivën Evropiane dhe Bled Strategic Forum në Slloveni, ka folur për liberalizimin e vizave, proces ky të cilit nuk po i dihet fundi.

“Sa i përket liberalizimit të vizave, ne presim që BE-ja të marrë masa sepse i kemi plotësuar kushtet. Janë disa zëra të vetmuar në BE që thonë ‘ta kthejmë procesin në zero dhe ta rivlerësojmë’. Kjo për ne është e papranueshme”, ka deklaruar presidentja Osmani.

“Imagjinoni sikur edhe vendet tjera të jenë të detyruara ta bëjnë këtë. Ne kemi qenë të detyruar që t’i përmbushim 94 kushte, pra më shumë se vendet e tjera. Ajo që kemi nevojë tani është që Komisioni Evropian të thotë ‘PO’. Ne duam të jemi optimistë dhe shpresojmë që liberalizimi i vizave të ndodh sa më shpejtë”.