Një javë nga vendosja e barrikadave në Veri, BE-ja thotë se po punon në shtensionim të situatës

Bashkimi Evropian thotë se po vazhdojnë të punojnë për deeskalimin e situatës në Veri të Mitrovicës.

Zëdhënësi i BE-së, Peter Stano ka thënë se përfaqësuesi i lartë Josep Borrell dhe ndërmjetësi evropian në dialog, Miroslav Lajçak janë në kontakt të vazhdueshëm me palët në përpjekje për shtensionim të situatës, shkruan Gazeta Online Reporteri.net.

“BE-ja, së bashku me partnerët e saj, vazhdon të punojë për deeskalim, veçanërisht në veri të Kosovës, në mënyrë që të sigurohet një mjedis i sigurt dhe lëvizje e lirë për të gjithë qytetarët”, ka thënë Stano në një konferencë për media në Bruksel.

Që nga e shtuna kur u vendosën barrikadat në Rudarë, ato vazhdojnë të jenë aty përkundër thirrjeve të ndërkombëtarëve që ato të hiqen. Pikat kufitare në Jarinjë e Bërnjak vazhdojnë të jenë të mbyllura edhe në ditën e shtatë, ndërkaq u raportua se dje është vendosur edhe barrikada e katërt.