Madona shtyn filmin e saj biografik një javë pasi njoftoi turneun botëror

Madona shtyn filmin e saj biografik një javë pasi njoftoi turneun

Filmi biografik i Madonës e cila prej dy vitesh po punonte për të sjellë një film për jetën e saj është pezulluar për një kohë të pacaktuar.

Lajmi se ikona e muzikës pop e ka shtyrë realizimin e tij, vjen një javë pasi ajo njoftoi turneun botëror, duke hedhur dyshime mbi të ardhmen e filmit.

Burimet thonë se ajo ende dëshiron ta bëjë filmin, por në një moment tjetër, pasi aktualisht po i kushton vëmendje koncerteve të saj të ardhshme.

“Kam një skenar shumë të gjatë që është vërtet e vështirë për mua ta bëj më të shkurtër. Kam pasur një jetë të jashtëzakonshme, duhet të bëj një film të jashtëzakonshëm. Shumë njerëz po përpiqeshin të bënin filma për mua, kryesisht burra mizogjenë, por askush nuk do të tregojë historinë time përveç meje,” është shprehur mbretëresha e popit.

Në qershor u publikua lajmi se aktores Julia Garner, e cila së fundmi luajti trashëgimtaren e rreme gjermane Anna Delvey në miniserialin e Netflix Inventing Anna, i ishte ofruar roli kryesor.

Julia thuhet se mposhti një sërë emrash të famshëm, duke përfshirë të nominuarën për Oscar, Florence Pugh, aktoret Emma Laird, Alexa Demie, si dhe këngëtare si Bebe Rexha dhe Sky Ferreira.