Kurti: Së pari tërheqja e bandave, pastaj ulja e numrit të policëve dhe normalizimi i veriut

Kryeministri Albin Kurti ka thënë se rrugëdaljen nga tensionet në veri e sheh në një “hekurudhë të drejtë me dy binarë”. Sipas tij, fillimisht duhet të tërhiqen huliganët nga rrugët e pastaj të ulet numri i policisë së pranishme në veri, dhe në të njëjtën kohë të avancohet me implementimin e marrëveshjes.

“Po punojmë shumë të gjejmë rrugëdaljen. S’duhet të jetë hekurudhë e lakuar, por me dy binarë. E para të dilet nga kriza me sundim të ligjit, huliganët në Serbi ose në burg në Kosovë, e më pas ulja e numrit të policisë dhe normalizim të situatës dhe implementimi i shpejtë, i plotë, pa shtyrje e pakushte i marrëveshjes së Brukselit”, ka thënë Kurti në Forumin e Bratislavës.

Kryeministri Kurti ka thënë se e sheh të arsyeshme praninë e Policisë në veri përderisa ka banda rrugëve. Ai ka thënë se do t’i mirëkuptonte po që se protestat do të ishin në kërkim të zgjedhjeve të reja.