Kurti: Kam qenë në dijeni të planit për tri atentatet, nuk e di sa jam i sigurt, por ndjehem i sigurt

Kryeministri Albin Kurti në “Samitin Digjital” ka folur edhe për atentantin e planifikuar ndaj tij në vitin 2021, teksa konfirmoi se ka qenë në dijeni për të trija rastet

Shefi i ekzekutivit tha “sa jam i sigurt nuk e di, por mund t’ua konfirmoj që ndjehem i sigurt” e që “sigurinë e vendosin organet e sigurisë”, derisa ka bërë të ditur se ka qenë në dijeni të planit për tri atentatet, por kanë vlerësuar se publikimi i atij plani ndihmon vetëm ata të cilët e kanë bërë.

“Sa jam i sigurt nuk e di, mund t’ua konfirmoj që ndjehem i sigurt, ndërkaq sa jam i sigurt e vendosin organet e sigurisë që marrin masa adekuate. Kam qenë në dijeni të planit për tri atentate, por e keni parë edhe nga informacioni që ka dalë unë e kam ditur shumë më herët se qëllimi ishte frikësimi i popullsisë, destabilizimi i vendit andaj kemi vlerësuar që publikimi i atij plani nuk ndihmon, përkundrazi ndihmon ata të cilët e kanë bërë planin. Prandaj me të drejtë kemi vlerësuar se më mirë është të mos bëhet publike, por çfarë masash do merren në vijim”, tha kryeministri i vendit.

Njësia Kundër Terrorizmit në Kosovë në vitin 2021 ka zbuluar një plan për atentat të mundshëm ndaj kryeministrit Albin Kurti, deputetit të PDK-së, Xhavit Haliti, si dhe Ismet Haxhës, ish-anëtar i Shërbimit Informativ të Kosovës./Reporteri.net/