KQZ-ja certifikon rezultatet për kryetarë në 35 komuna për zgjedhjet e 12 tetorit

Komisioni Qendror i Zgjedhjeve ka certifikuar rezultatet e zgjedhjeve lokale të 12 tetorit për kryetarë në 35 komuna. Me 10 vota për, KQZ-ja certifikoi rezultatet.

Ndërsa po ashtu u shpallën edhe rezultatet përfundimtare të zgjedhjeve për kuvende komunale në 37 komuna. Përjashtim ka mbetur komuna e Drenasit, ku ende në Gjykatën Supreme nuk është përmbyllur vendimmarrja për një ankesë të parashtruar, ka njoftuar kryesuesi i KQZ-së, Kreshnik Radoniqi.

Janë shpallur rezultatet përfundimtare edhe për zgjedhjet për kryetarë në Prishtinë, Junik e Mamushë.

Radoniqi ka thënë se KQZ-ja ka qenë gati qysh javën e dytë pas zgjedhjeve të shpallë rezultatet e ta bëjë certifikimin, por për shkak të ankesave të shumta që ka pasur në PZAP dhe Gjykatë Supreme ka qenë e pamundur të bëhet.