Juventusi ka zgjedhur Milikun para Depayt

Juventusi ka zgjedhur Arkadiusz Milikun para Memphis Depay dhe tani po punohet për kushtet personale me polakun.

Drejtuesit e Bianconerëve u takuan me Massimiliano Allegrin sot për të diskutuar se cili lojtar duhet të jetë objektivi i tyre kryesor dhe u mor vendimi për të ecur përpara për Milikun.

Juventusi tashmë ka rënë dakord për kushtet me Olympique Marseille, për një marrëveshje huazimi prej 2 milionë eurosh me një opsion blerjeje prej 8 milionë eurosh, dhe tani drejtuesit e klubit janë në bisedime me agjentin e sulmuesit polak, shkruan gazetari Di Marzio.

28-vjeçari Milik iu bashkua Marseilles në një marrëveshje huazimi prej 4 milionë eurosh me një opsion blerjeje prej 8 milionë eurosh nga Napoli në janar 2021. Gjatë 18 muajve të tij me klubin, ai ka shënuar 30 gola në 55 ndeshje.

Juventusi shpreson që ardhja e polakut do të ndihmojë sulmin, që duket i nevojshëm pas një barazimi 0-0 me Sampdoria të dielën.

Bianconerët do të shpresojnë të mbyllin ardhjen e Milik në ditët në vijim, me fundin e afatit kalimtar të verës që po afrohet me shpejtësi.