I përdori numrat e ashensorit – një burrë nga Massachusetts fitoi 300 mijë dollarë në lotari

Një burrë nga Massachusetts fitoi 300 mijë dollarë (rreth 278 mijë euro) në lotari duke përdorur një grup numrash nga ashensori i punës së tij të vjetër.

Sipas Lotarisë Shtetërore të Massachusetts-it, banori i Weymouth-it, Sylvester Semedo, luajti të njëjtin grup numrash – 2, 6, 10, 14 dhe 18 – tre herë në një biletë të vetme të lojës “Mass Cash”, për shortin e datës 26 qershor, përcjell Telegrafi.

Semedo u tha zyrtarëve të lotarisë se këto ishin të vetmet kate ku ndalonte ashensori në ndërtesën ku kishte punuar më parë.

Këta numra i siguruan atij një çmim prej 300 mijë dollarësh amerikanë – nga 100 mijë dollarë (rreth 92,600 euro) për secilin grup të luajtur.

Ai tha se planifikon të përdorë një pjesë të fitimeve për të ndjekur një ndeshje të Boston Red Sox jashtë fushës së tyre. /Telegrafi