Gjenerali Milley: Asnjë HIMARS amerikan nuk është shkatërruar nga Rusia

Deri më sot, asnjë sistem raketash HIMARS nuk është shkatërruar nga ushtria ruse, deklaroi kreu i Shtabit të SHBA-së, Mark Milley, raportoi BBC-ja të enjten.

Sipas Mileyt, HIMARS-ët janë shumë precizë, ndërsa ukrainasit “po i përdorin me efektivitet”.

“Këto sisteme nuk janë shkatërruar nga rusët deri më sot. Dhe ata (ukrainasit) po i përdorin ato në mënyrë shumë efektive, duke përdorur armë precize kundër objektivave”, tha Milley.

Ai tha se forcat ukrainase janë përdoruese të afta të armëve luftarake.

Rusia pretendon se kanë arritur t’i shkatërrojë disa nga armët e perëndimit, në veçanti HIMARS-ët amerikan.

SHBA-ja të mërkurën mori vendim ta furnizojë Ukrainën edhe me 4 sisteme të tjera raketash HIMARS. Në total, deri më tani ia ka dërguar 16 të tilla.

Sulmi nëpërmjet këtij sistemi raketor mund të shkojë deri në 84 kilometra ose më shumë, gati tri herë më tepër se rrezet e raketave të tjera.

Raketat drejtohen nëpërmjet sistemit “gps”.