Deputeti ukrainas me fjalim për Kosovën në Këshillin e Evropës

26/01/2023

Në Asamblenë Parlamentare të Këshillit të Evropës, për Kosovën ka folur edhe deputeti ukrainas, Oleksiy Goncharenko.

Gazetari britanik, Tim Judah, që përcjell zhvillimet në Kosovë dhe Ballkanin perëndimor e ka shpërndarë fjalimin e Goncharenkos, duke thënë se Kosova e ka gjetur befasisht një avokues për cështjen e saj.

“Kosova ka gjetur një mbështetes befasues, Goncharenkon. Ukraina nuk e ka njohur Kosovën, por ai po përpiqet që ta bindë Qeverinë për ta njohur”, ka shkruar Judah.

Deputeti ukraianas, ndër të tjera, tha në Asamblenë e KiE se shteti i tij duhet ta njohë pavarësinë e Kosovës dhe Kosova duhet të pranohet në Këshill të Evropës. Më vonë edhe në Bashkimin Evropian.

“Është e nevojshme që të njihet pavarësia e Kosovës. Është e nevojshme për Kosovën të bëhet anëtare e Këshillit të Evropës, dhe, në të ardhmen, anëtare e Bashkimit Evropian”, ka thënë Goncharenko.

Ligjvënësi ukrainas është bërë i njohur për qasjen e tij pro Kosovës që nga sulmi ushtarak që Rusia ia bëri Ukrainës. Ai ka kritikuar Serbinë, që ishte prej vendeve të pakta në botë që ishte krah Rusisë, duke mos e dënuar dhe mos e sanksionuar pas agresionit të saj. /Express/

Written by: ClubFm Kosova

Rate it