Del ekspertiza preliminare, këto janë arsyet e rënies së çatisë së Komunës së re të Prishtinës

Komuna e Prishtinës ka publikuar sot një vlerësim preliminar të dëmtimit të kulmit të ndërtesës së re në Arbëri, si pasojë e së cilës u lëndua një vajzë 23-vjeçare të enjten.

Raporti preliminar është përpiluar nga dy ekspertë të fushës të kontraktuar nga komuna, arkitektët Visar Geci dhe Gëzim Kastrati.

“Për të bërë një analizë preliminare se çka e ka shkaktuar këtë rënie të kulmit dhe për këtë rast kemi ftuar dy profesionistë të fushës, z. Visar Geci dhe z. Gëzim Kastrati, të cilët i kam parë si neutral dhe profesionistë të cilët veprojnë jashtë komunës, në mënyrë që ta analizojnë dhe të na japin një arsye mbi rrëzimin e kulmit të ndërtesës së Komunës së re”, tha Rama.

“Komplet kulmi ka rënë sepse komplet struktura në të cilën është ndërtuar kulmi nuk është e bazuar në standarde”, tha Visar Geci, bashkë-përpilues i raportit.

“Ky është kulmi që del jashtë murit. E kanë bërë strehën për shkak që kur të bie shi, të mos rrjedh uji në fasadë. Këtu ka qenë problemi. Këtu ka hyreë fryma dhe komplet e ka çuar kulmin lartë”, tha Geci, derisa prezantoi raportin para mediave.

“Dhe, problemi më i madh ka qenë ky.. këtu janë dy brinaket të cilat e kanë mbajt komplet kulmin. Problemi u kanë që këto vetëm kanë pushuar në mur, nuk janë ankeruar asnjëra prej tyre. Do të thotë kjo është sikurse me dal me një kapelë, kur fryn era ta heq kapelën. Shihet qartë në këtë fotografi se asnjëra brinake s’ka qenë e ankeruar”, ka shpjeguar Geci.

Rama ka thënë se Komuna e Prishtinës është e hapur për ekspertiza të tjera, përfshirë edhe atë të Prokurorisë.

“Kemi qenë tërë kohën në kontakt me Policinë dhe i kemi pyetur nëse mund të vazhdojmë me vlerësimin preliminar të gjendjes”, ka thënë Rama.

Ai e ka vlerësuar si urgjente çështjen e vlerësimit të gjendjes në kulmin e ndërtesës së re të Komunës së Prishtinës në lagjen Arbëria.

I pari i qytetit ka thënë se është iniciuar edhe përgatitja e një raporti përfundimtar nga komuna, i cili do të përfshijë më gjerësisht shkaqet e rënies së kulmit. Në këtë raport, ai ka paralajmëruar të jenë të përfshirë edhe procedurat e prokurimit dhe pranimit teknik të punës së renovimit të çatisë.