Deklarata e Pacollit për mediat, reagon AGK-ja dhe KMShK-ja

Në një fjalim të sotëm në Kuvend, deputetja e partisë në pushtet, Lëvizjes Vetëvendosje, Fitore Pacolli ka bërë thirrje për rregullim qeveritar të mediave, sidomos të atyre online.

Thirrja e hapur e deputetes Pacolli për ndërhyrje direkte të Qeverisë për kontroll ndaj mediave është e papranueshme për Asocacionin e Gazetarëve të Kosovës dhe Këshillin e Mediave të Shkruara të Kosovës.

Sipas tyre, deklarata të tilla paraqesin rrezik për lirinë e medias në vend.

“Mediat, shumica e të cilave janë të regjistruara si biznese në ARBK, kurse një pjesë tjetër si OJQ, rregullojnë veprimtarinë e tyre nëpërmjet ligjeve përkatëse në Kosovë dhe rregulloreve të Komisionit të Pavarur të Mediave dhe Këshillit të Mediave të Shkruara”, thuhet në reagimin e tyre.

Tutje, thuhet se çdo tentim i Qeverisë për të ushtruar kontroll mbi mediat është tentativë e papranueshme për të ndërhyrë në punën e tyre.

“Ky është kërcënim serioz i pushtetit aktual kundër mediave”.