Bideni udhëton në Gjermani më 25 qershor

Presidenti amerikan, Joe Biden, do të takohet me aleatët në Gjermani dhe Spanjë në fund të qershorit, në përpjekje për t’i mbajtur të bashkuar kundër pushtimit rus të Ukrainës.

Shtëpia e Bardhë ka bërë të ditur të mërkurën se Bideni do të udhëtojë në Gjermaninë jugore më 25 qershor, për të marrë pjesë në samitin e G7-s, njoftoi Associated Press të mërkurën.

Pas këtij takimi, Bideni do të udhëtojë për në Madrid, më 28 qershor për të marrë pjesë në një takim tjetër, samitin e radhës të NATO-s.

Të dy këto takime të rëndësishme do të mbahen në kohën kur po bëhen katër muaj nga nisja e luftës në Ukrainë, derisa SHBA-ja dhe aleatët e saj po vazhdojnë të dërgojnë armatim të rëndë atje për t’i dalë në ndihmë Ukrainës.