BE në Tiranë: Negociatat me Shqipërinë po ecin përpara

18/01/2023

Delegacioni i Bashkimit Europian në Tiranë përmes një njoftimi në rrjete sociale ka bërë me dije se procesi i negociatave të anëtarësimit të Shqipërisë në BE po ecën përpara.

“Procesi i negociatave të anëtarësimit të Shqipërisë në BE po ecën përpara! Dje përfundoi procesi i shqyrtimit analitik të grupit të parë të kapitujve, që fokusohen kryesisht në të drejtat themelore të BE-së, sundimin e ligjit, reformën e administratës publike dhe kriteret ekonomike.

Sot në Bruksel nisën takimet dypalëshe të shqyrtimit analitik të grupit të dytë të kapitujve, ku trajtohen katër liritë themelore të tregut të përbashkët të BE-së: lëvizjen e lirë të njerëzve, shërbimeve, mallrave dhe kapitalit, krahas politikës së konkurrencës, pronësisë intelektuale dhe të drejtën e kompanive, shërbimet financiare, mbrojtjen e konsumatorit dhe të shëndetit. Urime përfaqësuesve #shqiptarë të përfshirë deri tani dhe vazhdoni punën e mirë. BE-ja do të vazhdojë t’ju qëndrojë pranë në këtë proces”, thuhet në njoftim.

Mw 19 korrik ka nisur zyrtarisht çelja e negociatave për anëtarësimin e Shqipërisë në Bashkimin Europian. Hapja zyrtare e negociatave nënkupton miratimin e ligjit të vendosur të BE-së (acquis), përgatitjet për zbatimin e tij dhe zbatimin e reformave ligjore, politike, administrative, ekonomike dhe reformave të tjera të nevojshme që vendi të përmbushë kushtet për anëtarësim. /Gazeta Express

Written by: ClubFm Kosova

Rate it