BE: Kosova ka të drejtë t’i heq targat “KM”, mirëpo procesin po e bën në shpërputhje me Marrëveshjen e 2016’ës

Se Kosova ka të drejtë të heq nga qarkullimi targat “KM, etj” të lëshuara nga MPB-ja serbe, e ka konfirmuar përsëri zëdhënësja për politikë të jashtme e BE-së, Nabila Masrali, por se mënyra se si e ka shkallëzuar procesin qeveria kosovare, ajo tha se “nuk është në pajtim me kornizën e dialogut të Brukselit”, raporton gazeta online Reporteri.net.

Duke folur në një konferencë për media, zëdhënësja e BE-së iu referua përsëri komunikatës për shtyp të publikuar të dielen në lidhje me vendimin e qeverisë kosovare.

“Ju e keni lexuar deklaratën ku themi se jemi në dijeni për vendimin e fundit të Qeverisë së Kosovës në lidhje me targat. Ne qartësisht theksojmë se Kosova ka të drejtë që gradualisht të ndërrojë targat KM, por ky proces duhet të jetë brenda kornizës së dialogut”.

Më tej, ajo shtoi se Bashkimi Evropian do të vazhdojë të punojë me palët për të arritur një zgjidhje të qëndrueshme për çështjen në fjalë, shkruan gazeta online Reporteri.net.

“Gjithashhtu, i bëjmë thirrje aktorëve politikë të mirëmbajnë paqen dhe të mos lejojnë ringjalljen e tensioneve të panevojshme në terren”, ka thënë mes tjerash zëdhënësja.

BE, njëjtë si Shtetet e Bashkuara, nuk e ka mirëpritur vendimin e Qeverisë së Kosovës për të mos shtyrë edhe për një periudhë dhjetë muajshe çështjen e ndalimit të targave të lëshuara nga MPB-ja serbe.

Qeveria ka marrë vendim që që nga 1 nëntori deri më 21 nëntor vetëm të qortojnë ata të cilës s’i kanë konvertuar targat në RKS, ndërsa mëpastaj të procedojë me gjoba (150 euro) deri në janar, për të proceduar më pastaj me targa provuese për një afat tjetër dy mujërosh, e që pas prillit 2023 përfundimisht të mos ketë më targa të lëshuara nga MPB-ja serbe për veturat e komunitetit serb të Kosovës, shkruan Reporteri.net.