”Amadeus” vjen me koncert në Tiranë për 17 shkurt

Orkestra e Fëmijëve dhe të Rinjve “Amadeus” nga Kosova do të performojë më 17 shkurt në skenën e Teatri Kombëtar i Operës, Baletit dhe Ansamblit Popullor, në një koncert të veçantë me rastin e Ditës së Pavarësisë së Kosovës, shkruan KultPlus.

Nën dirigjimin e Vehbi Shosholli, të rinjtë muzikantë do të sjellin një program të larmishëm që ndërthur elegancën klasike me energjinë moderne dhe ritmet shqiptare. Koncerti do të përfshijë vepra si “Gramophone Waltz”, pjesë nga Beethoven, “Palladio”, ritmet e njohura të “Can-Can” si dhe tinguj shqiptarë si “Malësorja”.

Mbrëmja synon të bashkojë traditën muzikore me energjinë dhe pasionin e gjeneratës së re, duke e shndërruar skenën e TKOBAP-së në një hapësirë festive që shënon përvjetorin e pavarësisë së Kosovës përmes artit dhe talentit të të rinjve.

Koncerti do të mbahet më 17 shkurt në ora 19:00, ndërsa biletat mund të sigurohen pranë biletarisë së TKOBAP-së çdo ditë sipas orarit zyrtar. /KultPlus.com