Afati për gomat e dimrit po ofrohet: Këto dënime parashihen nëse nuk i ndërroni

Afati ligjor për ndërrimin e gomave të verës me ato të dimrit në Kosovë po afrohet.

Ky afat për ndërrimin e gomave është 15 nëntori dhe, sipas ligjit, gomat e ndërruara të dimrit duhet të jenë të vendosura nga shoferët në automjetet e tyre deri më 15 mars.

Me ligjet aktuale në fuqi, gjatë kushteve dimërore ndalohet qarkullimi i automjeteve dhe i bashkësisë së mjeteve të cilat nuk i kanë të vendosura pajisjet dimërore.

Shoferi, që drejton automjet pa pajisje dimërore në të ashtuquajturin sezon dimëror, dënohet për kundërvajtje, me gjobë prej 40 eurosh.

Sipas Ligjit, dënohet për kundërvajtje, me gjobë prej 100 deri në 300 euro, edhe personi juridik apo institucioni publik në emër të të cilit dhe brenda autorizimeve të të cilit ka vepruar shoferi.