A është rrezik ta pimë ujin nga gota që e lëmë pranë shtratit?

Është një praktikë relativisht e zakonshme ta lëmë një gotë me ujë pranë shtratit, në rast se kemi etje gjatë natës për t’u freskuar.

Por, se a paraqet rrezik kjo për shëndetin tonë është një debat i madh.

Lidhur me këtë, ekspertja shëndetësore Kelly Johnson-Arbor tregoi një mori arsyesh se çfarë ndodh në gotën të mbushur me ujë që e lëmë tërë natën.

Mund të kontaminohet

Pa një kapak, ndotësit mund të futen në gotën tuaj me ujë. “Një gotë e hapur është e ndjeshme ndaj ndotjes nga pluhuri, mikrobet, insektet”, thotë Johnson-Arbor. “Kjo gjithashtu përfshin çdo gjë tjetër që lundron ose fluturon në ajër”.

Trupi juaj tret insektet ose “antropodët” ashtu si çdo ushqim tjetër, kështu që kjo nuk mund të dëmtojë shëndetin tuaj sa do që ju shpif kjo gjë, sipas klinikës Mayo.

Thënë kështu, hulumtimet tregojnë se kimikatet toksike mund të gjenden në pluhurin e shtëpisë dhe me kalimin e kohës, marrja e sasive të larta shoqërohet me probleme shëndetësore.

Mund të ketë shije të hidhur

Nëse keni pirë ndonjëherë një gotë me ujë që është lënë jashtë gjatë natës, mund të keni vënë re ndryshimin delikat në shije. Ka një shpjegim për këtë, thotë Johnson-Arbor.

“Kur lini një gotë ujë jashtë gjatë natës, gazrat në ajër, duke përfshirë dioksidin e karbonit, treten në ujë”, thotë ajo. “Kur dioksidi i karbonit tretet në ujë, ai shndërrohet në acid karbonik, prandaj uji i mbetur mund të ketë shije të hidhur”.

Mund të përmbajë baktere

Sipas Institutit Kombëtar të Shëndetit (NIH), goja juaj është shtëpia e rreth 700 llojeve të mikrobeve. Janë shumë baktere.

Pirja nga një gotë do të rezultojë në shpëlarje – kur lëngjet përzihen me bakteret në gojën tuaj përpara se të ktheheni në enë. Kjo është arsyeja pse Johnson-Arbor thotë se duhet të shmangni pirjen nga një gotë me ujë që është lënë jashtë gjatë natës nëse dikush tjetër e ka përdorur më parë.

“Gojët tona përmbajnë lloje të shumta bakteresh që mund të kontaminojnë shishet e ujit ose gotat nga të cilat ne pimë”, thotë ajo. “Ndërsa bakteret tona nuk kanë gjasa të shkaktojnë efekte të dëmshme nëse ripërdorim një shishe uji ose një gotë të pijshëm pasi e lëmë jashtë gjatë natës, këto mikrobe mund të jenë të dëmshme për njerëzit e tjerë dhe anasjelltas”.

Pra, sa ekziston rreziku të pimë ujin që e kemi lënë gjatë natës?

Uji që qëndron gjatë natës ndryshon kryesisht shije, por jo sigurinë e ujit. Gjërat që mund t’u duken të shpifura mund të futen në gotën tuaj, të tilla si insektet dhe pluhuri, por këto janë të padëmshme.

“Në përgjithësi, edhe pse uji mund të mos ketë shije aq të mirë nëse lihet jashtë gjatë natës, nuk ka gjasa të sëmurë dikë”, thotë Johnson-Arbor. “Përgjithësisht është e sigurt për të pirë ujë që është lënë jashtë gjatë natës për sa kohë që nuk ka ndotje të dukshme të ujit”. /Telegrafi/