Vidhet brenda 3 minutave një pikturë me vlerë miliona euro e Pierre-Auguste Renoir në Itali

Një pikturë e çmuar e piktorit impresionist Pierre-Auguste Renoir, e titulluar “Les Poissons”, është vjedhur nga ambientet e Fondacionit Magnani-Rocca në Mamiano di Traversetolo, pranë Parmës, në Itali. Lajmi u raportua fillimisht nga mediat italiane dhe është konfirmuar edhe nga agjencia ANSA.

Bëhet fjalë për një pikturë vaj në telajo, e realizuar rreth vitit 1917, me një vlerë që arrin disa milionë euro. Vepra konsiderohej ndër të rrallat e Renoir që ruheshin në një koleksion të përhershëm në Itali.

Sipas burimeve, vjedhja ka ndodhur brenda vetëm tre minutave. Hajdutët kanë hyrë në ambientet e Vilës Magnani, e njohur si “Villa dei Capolavori”, dhe kanë arritur të marrin pikturën pa u zbuluar menjëherë, duke ngritur pikëpyetje mbi sigurinë e objektit.

Hetimet janë në zhvillim dhe po drejtohen nga autoritetet italiane, të cilat po punojnë për identifikimin e autorëve dhe rikuperimin e veprës së vjedhur.

Pierre-Auguste Renoir, i lindur në vitin 1841 në Francë, ishte një nga figurat më të rëndësishme të impresionizmit. Ai njihet për përdorimin e ngjyrave të ngrohta dhe dritës natyrale, duke pikturuar shpesh skena të jetës së përditshme, portrete dhe figura njerëzore që përcjellin gëzim, elegancë dhe harmoni.

Fondacioni Magnani-Rocca konsiderohet një nga institucionet më të rëndësishme artistike në Itali, duke ruajtur kryevepra nga artistë të njohur si Claude Monet, Paul Cézanne, Tiziano, Peter Paul Rubens dhe Francisco Goya./KultPlus.com