“Mirupafshim, privatësi!”: GeoSpy, një mjet i AI që thuhet se mund të gjejë vendndodhjen ku është bërë një fotografi

Një mjet i radhës i Inteligjencës Artificiale, thuhet se është i trajnuar me miliona imazhe dhe mund të gjejë vendndodhjen e një fotografie për pak sekonda.

Një raport i fundit nga mediat e huaja, përcjell Telegrafi, theksoi shfaqjen e GeoSpy, një mjet i avancuar i AI i zhvilluar nga kompania Graylark Technologies me bazë në Boston.

Sipas raportimeve, GeoSpy është i aftë të përcaktojë me saktësi vendndodhjen e një fotografie duke analizuar elemente si bimësia, arkitektura, marrëdhëniet hapësinore, lloji i rrugës dhe detaje të tjera të vogla në imazh.

Sistemi, i trajnuar më parë me miliona foto nga e gjithë bota, mund të përcaktojë një vendndodhje relativisht saktë deri në qytet apo zonë.

Edhe pse zakonisht nuk arrin deri te numri i saktë i rrugës ose shtëpisë, ai mund të kufizojë zonën e kërkimit në disa kilometra katrorë.

GeoSpy e bën jashtëzakonisht të lehtë për këdo të identifikojë vendndodhjen e një fotoje, duke eliminuar nevojën për aftësi të specializuara.

Graylark Technologies, kompania pas GeoSpy, thotë se e ka zhvilluar këtë mjet për agjencitë qeveritare dhe forcat e rendit.
Megjithatë, për disa muaj, GeoSpy ishte i disponueshëm për këdo që dëshironte ta provonte.

Kështu, njerëzit filluan të ndanin video në internet që tregonin se sa i fuqishëm ishte GeoSpy—duke gjetur vendndodhjen e një fotoje për pak sekonda.

Mediat raportojnë se disa individë madje filluan ta përdorin atë për ndjekjen e grave të tyre. /Telegrafi/